అనంతపురం డీఐజీ చారుసిన్హా... ఐపీఎస్. ఖాకీ దుస్తుల్లో కఠినంగా కనిపించే చారుసిన్హాలో సున్నితమైన మరో కోణం ఉంది. అది ఇటీవల జరిగిన తిరుమల బ్రహ్మోత్సవాల్లో అందరి దృష్టినీ ఆకర్షించింది. పోలీసు అధికారులకు సూచనలిస్తూ, భద్రతా ఏర్పాట్లను పర్యవేక్షిస్తూ, భక్తులు కిటకిటలాడే వాహన సేవల్లో హడావుడిగా తిరుగుతూ కనిపించిన ఆమె చేతిలో పిస్టల్ బదులు ఎస్ఎల్ఆర్ కెమెరా ఉండడం విశేషం. గంటలకు గంటలు వాహనం ముందు నడుస్తూ ఆమె ఫోటోలు తీశారు. ఆమె కెమెరాను దేవుడి మీదగాక దేవుణ్ణి వీక్షించే భక్తుల మీదకు ఎక్కుపెట్టారు. వృద్ధుల ముఖంలో కనిపించే అలౌకిక దైవానుభూతినీ, పిల్లల అమాయకపు ఆనందాన్నీ ఆమె ఫోటోల్లో పదిలపరిచారు. అప్పుడు ఆమెను పలుకరిస్తే ఆసక్తికరమైన విశేషాలెన్నో చెప్పారు.చారుసిన్హా. తల్లి, తండ్రి ఇద్దరికీ ఫోటోగ్రఫీ అంటే ప్రాణం.వారికి తొలి మోడల్ చారుసిన్హానే. రోజుల బిడ్డ నుంచీ ఇప్పటిదాకా వాళ్ళిద్దరూ ఆమెను ఫోటోలు తీస్తూనే ఉన్నారు. తల్లిదండ్రుల అభిరుచి వారసత్వంగా చారుసిన్హాకీ వచ్చింది. బుడిబుడి అడుగులనాడే ఆమె కెమెరాను చేతబట్టారు. తండ్రి స్నేహితుడి స్టూడియోలోని డార్క్ రూం చారుసిన్హాకు చిన్నప్పటి నుంచి సుపరిచితం. తండ్రితో పాటు అయిదవ ఏట నుంచి 15వ సంవత్సరం వరకు డార్క్ రూంకు వెళ్లి ఫోటోలను డెవలప్ చేసేవారు.
" మా అమ్మకి సూర్యోదయం,సూర్యాస్తమయం అంటే చాలా యిష్టం.ఆమె తీసిన ఫోటోల్లో ఎక్కువ అవే. ఫోటోలు తీసేపుడు నన్ను కూడా వెంట తీసుకుపోయేవారు. అప్పుడామెకి నేనే మోడల్. మా నాన్న ఫోటోలు తీసేపుడు నేను ఆసక్తిగా చూసేదాన్ని, కెమెరా హాండ్లింగ్ అలాగే నేర్చుకున్నాను. ఇప్పుడు కూడా నా ఫోటోలను మా ఫాదర్ చూసి తప్పొప్పులు చెపుతుంటారు. పిల్లలు, వృద్ధులు, ప్రకృతి..ఇవే ఫోటోగ్రఫీలో నా ఆసక్తులు.'' అంటారు చారుసిన్హా.
కొసావో నుంచి కేదార్నాథ్ వరకు....చారు సిన్హా హైదరాబాద్ లోని సెంట్ఫ్రాన్సిస్ కాలేజీలో డిగ్రీ చదివారు. సెంట్రల్ యూనివర్శిటీలో పొలిటికల్ సైన్స్ లో పీజీ చేశారు. 1996లో ఐ.పి.ఎస్కి ఎంపికయ్యారు. 2005లో యు. ఎన్. పీస్ కీపింగ్ మిషన్ కు డిప్యుటేషన్ పైన కొసావో వెళ్లారు. సెలవు దొరికినపుడల్లా ఆ చుట్టుపక్కల దేశాలు తిరిగారు. తనకు నచ్చిన దృశ్యాలను కెమెరాలో బంధించారు. "కొసావోలో ఏడాది పాటు వున్నాను. ఆ దేశాల్లో శీతాకాలంలో మైనస్ 31 డిగ్రీలుంటుంది. ప్రకృతి చాలా అందంగా వుంటుంది. చాలా నిశ్శబ్దంగా వుంటుంది. మంచుపడే చప్పుడులోని సంగీతం విన్నాను. అక్కడ ఉండగానే రష్యా, రుమేనియా, హంగేరి, స్విట్జర్లాండ్,జర్మనీ, ప్యారిస్, బెల్జియం, హాలెండ్, గ్రీస్, ఈజిస్టు, నార్వే, స్వీడన్, డెన్మార్క్ ఇలా 18 దేశాలు చూశాను.ఎందరినో కలిశాను.
ఆ అనుభూతులన్నీ కెమెరాలోకెక్కించాను.'' అని చెబుతూ ఆ ఫోటోలన్నీ చూపించారు. చారుసిన్హా. తనను దాసోహం చేసుకున్న ప్రకృతిని ఆమె ఫోటోలుగా పదిలపరచుకున్నారు." ఇండో ఛైనా బార్డర్ లో పాంగ్ గాంగ్ లేక్ వుంది. ఆ సరసు కొంత భాగం భారతదేశంలోనూ, మిగిలిన భాగం చైనాలోనూ వుంటుంది. బ్లూ కలర్లో ఎన్ని షేడ్స్ వున్నాయో అన్నీ ఆ సరస్సులో కనిపిస్తాయి. మంచు కొండలు ఆ సరస్సులో అందాలు దిద్దుకుంటూ వుంటాయి. సూర్య కాంతిలోని తీవ్రతను బట్టి సరస్సులోని నీరు రంగులు మారుతుంది. నీటితో పాటు మంచుకొండల రంగులు కూడా మారుతూ వుంటాయి. ఫోటోగ్రాఫర్లకు ఆ సరస్సు ఒక షడ్రసోపేత విందు. త్రీఇడియట్స్ సినిమా చివర్లో ఆ సరస్సు కనిపిస్తుంది. కులుమనాలి నుంచి లడక్ వరకు వెళ్లాను. ఈజిప్టు పిరమిడ్స్ను చూశాను.
రష్యాలో ప్రతి ఇల్లు కలపతో గాక ప్రేమతో నిర్మించారేమో అనిపిస్తుంది. అంత ముచ్చటగా ఉంటాయి అవి. మన దేశంలో కేదార్నాథ్, బద్రీనాథ్లలో రుషుల ఫోటోలు తీసాను. అంత చలిలోనూ వారు ఒంటిమీద నామమాత్రపు దుస్తులతో బూడిద పూసుకుని వుంటారు. కొందరు నిప్పులమీద నడుస్తారు. వారి ముఖంలో కనిపించే ఆధ్యాత్మికత, శాంతి, తపోశక్తి అద్భుతం.'' అంటూ ఆమె తన యాత్రానుభవాలు వివరించారు.
వెంకటేశుని ప్రేమలో..2006లో కొసావోలో డిప్యుటేషన్ పూర్తవగానే చారుసిన్హాను చిత్తూరు ఎస్పీగా నియమించారు. ముక్కుసూటిదనం ఆమెకు చిక్కులు తెచ్చింది. అనేక పాతకేసులను తిరగదోడారు. మూడు నెలలు తిరక్కముందే ఆమెపై బదిలీ వేటు పడింది. ఆమె బదిలీని నిరసిస్తూ జిల్లాలో ఆటోలవాళ్ళు, కార్మికులు రోడ్లమీదకు వచ్చారు. అది ఆమెను తీవ్రంగా కలచివేసింది. అయితే ఆ కలత బదిలీ గురించి కాదంటారు ఆమె.." .నేను చిత్తూరు ఎస్పీగా వున్నపుడు ఎన్నో సార్లు తిరుమల వెళ్లాను. వీఐపీల వెంట డ్యూటీగా వెళ్ళేదాన్ని. దర్శనానికి కూడా వెళ్ళేదాన్ని. అయినా దేవుడి మీద ప్రత్యేక ఆసక్తి ఏదీ కలుగలేదు.
అయితే, బదిలీ అయిన రోజు ఎందుకో చాలా వెలితిగా అనిపించింది. నేను వెంకటేశ్వరస్వామిని మిస్ అవుతానని అనిపించింది. ఆత్మీయులకు దూరంగా వెళ్ళిపోతున్నాననే ఫీలింగ్ అది. తెలియని అనుబంధం ఏదో శ్రీవేంకటేశ్వరునితో ఏర్పడింది. ఇక అప్పటి నుంచి తిరుమలకు తరచూ వస్తూనే వున్నాను. గొప్ప శాంతి లభిస్తుంది ఇక్కడ నాకు. '' అంటూ తనలోని ఆధ్యాత్మిక కోణాన్ని బయటపెట్టారు చారుసిన్హా.. చిన్నపిల్లలు, వృద్దులు, ప్రకృతి మాత్రమే అప్పటిదాకా ఆమె సబ్జెక్టులు. ఇప్పుడు తిరుమల వాసుడూ అందులో చేరాడు. 2010 శ్రీవారి బ్రహ్మోత్సవాలపుడు ఆమె మొదటిసారి వెంకటేశ్వరస్వామి ఫోటోలను తీయడం ప్రారంభించారు. అప్పుడు 15- 80 వైడ్ లెన్స్ ఉపయోగించారట. 2011లో 80- 200 జూమ్ లెన్స్తో ఉత్సవ మూర్తిని తిలకించే భక్తుల మూడ్స్ను క్లోజప్ ఫోటోలు తీశారు.
తన సబ్జక్టుల గురించి వివరిస్తూ, "వృద్ధుల కంటి కింది ముడతల్లో నాకు జీవితానుభవం కన్పిస్తుంది. పిల్లల్లో స్వచ్ఛత కనిపిస్తుంది. చిన్న పిల్లలు, వృద్ధులు, ప్రకృతి.. ఈ మూడింటిలోనూ స్వామి వారే వున్నారనే సత్యం నాకు తెలిసింది. అందుకే ప్రకృతిని నాతో దాచుకోవటానికి యత్నించినట్టే.... వెంకటేశ్వరస్వామివారి ప్రతిమూడ్ను కూడా కేప్చర్ చేయాలనుకున్నాను. ప్రతి అలంకారంలోనూ ఆయన చాలా అందంగా వుంటాడు. ఒక్క సెకను కూడా స్వామి నుంచి దృష్టిని పక్కకు మరల్చకూడదని అనిపిస్తుంది. అంత అందం స్వామిది. స్వామివారిని చూడటం ఇక చాలు అని తృప్తి పడటం అసాధ్యం. అందుకే ఒక్కో వాహనాన్ని 400 ఫోటోలు తీశాను.'' అని చెప్పారు.ఫోటోగ్రఫీతో ఒత్తిడి దూరం...
"వృత్తిలో, కుటుంబంలో ఉండే ఒత్తిళ్ల నుంచి బయటపడడానికి ఫోటోగ్రఫీ నాకు ఎంతో దోహదపడుతోంది. మనసు చికాగ్గా ఉన్నపుడు వెంటనే కెమెరా తగిలించుకుని బయటకు వెళ్ళిపోతాను.ప్రశాంతంగా తిరిగి ఇంటికి చేరుకుంటాను.'' అంటారామె. పెయింటింగ్,శిల్పకళ, సంగీతం,ఫోటోగ్రఫీ ఇలా ఏదో ఒక హాబీ ప్రతి ఒక్కరికీ అవసరం. అన్ని స్థాయిల్లోనూ విద్యాలయాల్లో వీటిని ప్రవేశపెడితే మంచిది అని ఆమె చెబుతున్నారు.
- ఎ.ఎస్.దినేష్ కుమార్, తిరుపతి
ఆసీస్ క్రికెట్ లెజెండ్గా పేరుగాంచిన డాన్ బ్రాడ్మన్ను, నేటి కాలంలో మాస్టర్ బ్లాస్టర్గా పేరుతెచ్చుకున్న సచిన్ టెం డూల్కర్ను క్రికెట్ చరిత్రలోనే బ్యాటింగ్ దిగ్గజాలుగా పేర్కొంటారు. సర్ డొనాల్డ్ బ్రాడ్మన్ తన కాలంలో అంతర్జాతీయ క్రికెట్లో బ్యాట్స్మన్గా పూర్తి ఆధిపత్యాన్ని చెలాయించారు. ఆయన 1920 దశకం చివరి కాలం నుంచి 1940 చివరి కాలం వరకు క్రికెట్లో బ్యాటింగ్ దిగ్గజంగా ప్రఖ్యాతిగాంచారు. ఆ కాలంలో ఆయన బాడీలైన్ బౌలింగ్ను గట్టిగా ఎదుర్కొన్న బ్యాటింగ్ లెజెండ్గా పాపులారిటీ సంపాదించుకున్నారు. 
ప్రపంచప్రఖ్యాతిగాంచిన ఇంగ్లీష్ కవిగా షేక్స్పియర్ పేరుగాంచితే కవిరత్న కాళిదాసు సంస్కృత కవిగా ప్రఖ్యాతిగాంచారు. కాళిదాసు చక్రవర్తి విక్రమాదిత్యుని కొలువులోని తొమ్మిదిమంది రత్నాల్లాంటి కవుల్లో ఒకరిగా గుర్తింపు పొందారు. కాళిదాసు అభిజ్ఞాన శాకుంతలం, మాళవికాగ్ని మిత్రం, విక్రమోర్వసీయమ్ వంటి నాటకాలు, రఘువం శం, కుమార సంభవం, మేఘదూత వంటి కవితలతో సాహితీరంగంలో తనకంటూ ఓ ప్రత్యేక స్థానాన్ని ఏర్పరచుకున్నారు. షేక్స్పియర్ హామ్లెట్, ద మర్చంట్ ఆఫ్ వెనిస్, రోమియో అండ్ జూలియట్, ఒథెల్లొ, కింగ్ లియర్ వంటి నాటకాలు వీనస్ అండ్ అడోనిస్, ద రేప్ ఆఫ్ ల్యుక్రీస్ వంటి కవితలతో గొప్ప కవిగా పేరుతెచ్చుకున్నారు.
దక్షిణాది సినిమాల డ్యాన్సింగ్ స్టార్ ప్రభుదేవాకు పాప్కింగ్ మైకేల్ జాక్సన్కు మధ్య ఓ పోలిక ఉంది. ఈ ఇద్దరు డ్యాన్స్ చేసే స్టైల్ ఒకే విధంగా ఉండడం విశేషం. ప్రభుదేవాని ఇండియన్ మైకెల్ జాక్సన్ అంటారు అభిమానులు.
ఒకప్పుడు హాలీవుడ్ను ఏలిన మహారాణిగా, అందాలతారగా మార్లిన్ మన్రో ఎంతో ప్రఖ్యాతిగాంచారు. ఆమె తన అందచందాలు, గ్లామర్, నటనతో పలు హిట్ సినిమాల్లో ప్రేక్షకులను మైమరపించారు. ఇక మన దేశానికి చెందిన అందాలరాశి, సినీతార మధుబాల సైతం నాడు పలు సక్సెస్ సినిమాలో చక్కగా నటించి ప్రేక్షకుల హృదయాల్లో చిర స్థాయిగా నిలిచిపోయారు. వీరిద్దరూ నాడు సినీ రంగాల్లో అగ్రతారలుగా రాణించి అపురూప సౌందర్యరాశులుగా పేరు తెచ్చుకున్నారు. మార్లిన్ మన్రో వీనస్ ఆఫ్ హాలీవుడ్గా పేరు గాంచితే మధుబాల వీనస్ ఆఫ్ బాలీవుడ్గా ప్రఖ్యాతిగాంచారు. మార్లిన్ మృతి నేటికీ మిస్టరీగా మిగిలిపోతే మధుబాల గుండెకు సంబంధించిన వ్యాధితో మరణించారు. వీరు చనిపోయి దశాబ్దాలు గడిచినా నేటికీ ఈ అందాలతారలను ప్రేక్షకులు గుర్తుచేసుకుంటూనే ఉంటారు.
అమెరికాకు చెందిన లెజండరీ సినిమా డైరెక్టర్, స్క్రిప్ట్ రైటర్, యాక్టర్, ప్రొడ్యూసర్ ఓర్సన్ వెల్స్. ఆయన రూపొందించిన పోర్ట్రయల్ ఆఫ్ సిటిజన్ కేన్ అంతర్జాతీయంగా ఎంతో పేరుతెచ్చుకుంది. ఆయన సినిమాలు ఒక్కోటి ఓ దృశ్య కావ్యంగా పేరుగాంచాయి. వెల్స్ మాదిరిగా గురుదత్ కూడా గొప్ప డైరెక్టర్గా, ప్రొడ్యూసర్, యాక్టర్గా పాపులారిటీ సంపాదించారు. ఆయన తీసిన ప్యాసా, కాగజ్ కే ఫూల్ వంటి సినిమాలు ఇప్పటి వరకు రూపొందించిన 100 బెస్ట్ ఫిల్మ్సలో ఒకటిగా పేరుతెచ్చుకున్నాయి. వీరిద్దరి జీవితాలు విషాదాంతంగా ముగిసాయి.
సాహితీ ప్రపంచంలో తిరుగులేని రచయిత్రులుగా వెలుగొందుతున్నవారు జాకీ కొలిన్స్, శోభా డే. వారి నవలలు పాఠకుల విశేష ఆదరాభిమానాలను చూరగొంటున్నాయి. కేవలం రచయిత్రిగానే కాకుండా కాలమిస్ట్గా, సోషలైట్గా, డిజైనర్గా సైతం శోభాడే పేరుతెచ్చుకున్నారు. ఈ ప్రఖ్యాత రచయిత్రిని టైమ్ మ్యాగజైన్ ‘జాకీ కాలిన్స్ ఆఫ్ ఇండియా’కు కీర్తించింది. 
మన దేశానికి చెందిన ప్రముఖ చిత్రకారుడు ఎం.ఎఫ్. హుస్సేన్ను ఫోర్బ్స మ్యాగజైన్ నాటి పాపులర్ ఆర్టిస్ట్ పబ్లొ పికాసోతో సరిపోల్చింది. వీరి పెయింటింగ్స్లో కొన్ని ఒకే శైలిలో రూపుదిద్దుకున్నాయి.ఎం.ఎఫ్.హు స్సేన్ మహాభారత సీరిస్లో భాగంగా గీసిన ‘దుర్యోధ న-అర్జున స్ల్పిట్’ పెయింటింగ్ పికాసో ‘గ్యుర్నికా’ పెయింటింగ్ ఒకే శైలిలో రూపుదిద్దుకున్నాయని ఆర్ట్ లవర్స్ పేర్కొంటారు.
షేక్ సౌదా బిన్ అల్ థాని ఓ అరబ్ షేక్. మహరాజా యశ్వంత్ రావు హోల్కర్ 2 మన దేశంలోని ఓ రాజ్యా న్ని పరిపాలించి చాలా సంవత్సరాల క్రితం మరణించిన రాజు. కానీ వీరిద్దరి మధ్య ముఖ కవళికలు, పోలి కలు ఒకే విధంగా ఉంటాయి. ప్రస్తుతం జీవించి ఉన్న షేక్ తాను గత జన్మలో మహరాజునని నమ్ముతారు. ఖతర్ దేశానికి చెందిన ఓ రాజు భావమరది అయిన షేక్ ఓ రోజు అమెరికన్ ఆర్టిస్ట్ మ్యాన్ రే గీసిన మహ రాజా యశ్వంత్ రావు హోల్కర్ 2 చిత్రపటాన్ని చూశారు. ఆ రాజుకు తనకు మధ్య పోలికలు ఉండడాన్ని గమనించిన ఆయన తానే గత జన్మలో ఆ రాజునని చెబుతారు. ఇద్దరూ సన్నగా ఉండడంతో పాటు ముఖం లోని వివిధ అవయవాలు సరిపోలినట్లు ఉంటాయి. ఐశ్వర్యవంతుడైన షేక్ దివంగత మహరాజా పెయింటింగ్లో పోజుతో ఫొటోలను కూడా తీయించుకున్నారు. ఇక మహరాజా 1961 సంవత్సరంలో మృతిచెందగా షేక్ జన్మించింది మాత్రం 1966లో.
పలు చిత్రాల్లో వెరైటీ క్యాప్స్తో అలరించిన టామ్ హ్యాంక్స్, అమీర్ ఖాన్లు ముఖ కవళికలు కూడా ఒకే విధంగా ఉంటాయంటారు వారి అభిమానులు. వారి నటన కూడా ఒకేవిధంగా ఉంటుందని చెబుతారు. ఇక ఆసియా సొసైటీ ఇంటర్వ్యూలో అమీర్ఖాన్ మాట్లాడుతూ హ్యాంక్స్కు తనకు మధ్య పెద్దగా పోలికలు లేవని కొట్టిపారేశారు. 
నాటి నుంచి నేటి వరకు దశాబ్దాలుగా సినీ రంగంలో పాపులర్ హీరోలుగా పేరుతెచ్చుకున్న వ్యక్తులు రాబర్డ్ డి నీరో, అమితాబ్ బచ్చన్లు. హాలీవుడ్లో రాబర్డ్ డి నీరో పలు హిట్ సినిమాలతో ప్రేక్షకులను ఉర్రూతలూగిస్తే బాలీవుడ్లో బిగ్ బి యాంగ్రీ యంగ్మన్గా ప్రేక్షకులను అలరిస్తున్నారు.
ప్రపంచంలోని గొప్ప లేడీ అథ్లీట్స్లో ఒకరైన ఫ్లోరెన్స్ గ్రిఫిత్ జాయ్నర్ 1988 సియోల్ ఒలిపింక్స్లో స్ప్రింట్ డబుల్తో పాటు రిలేలో గోల్డ్ మెడల్స్ను సాధించి అం దరి దృష్టిని ఆకర్షించారు. కేవలం అథ్లెటిక్గానే కాకుండా ఆమె ఫ్యాషనబుల్ వస్త్రాలు ధరించడం, ఆరు అంగుల పొడవైన రంగు, రంగుల చేతి గోర్లతో ఆ కాలంలో ఫ్యాషన్ సింబల్గా నిలిచారు. ఇక ఇదే తరహాలో మన దేశానికి అథ్లెట్ అశ్వినీ నాచప్ప కూడా పేరు తెచ్చుకున్నారు. 1980 చివరి దశకం నుంచి 1990 దశకం ప్రారంభం వరకు అశ్విని నాచప్ప గొప్ప అథ్లెట్గా పాపులారిటీ సంపాదించుకోవడమే కాకుండా ట్రెండీగా హెయిర్ స్టైల్, ఉపయోగించే ఫ్యాషన్ యాక్ససరీస్తో అందరినీ ఆకట్టుకున్నారు.
2010 సంవత్సరం ప్రారంభంలో ఫోర్బ్స మ్యాగజైన్ అజీమ్ ప్రేమ్జీని సాఫ్ట్వేర్ మొగల్ బిల్ గేట్స్తో సరి పోల్చింది. గేట్స్ మాదిరిగానే విప్రో చైర్మన్ అజీమ్ సైతం తన ఆదాయంలో పెద్ద మొత్తాన్ని ఛారిటీ కార్యక్రమాలకు వెచ్చిస్తూ వస్తున్నారు. ఆయన తన అజీమ్ ప్రేమ్జీ ఫౌండేషన్ ద్వారా 2010 డిసెంబర్లో 88,460,000,000రూ.లను సేవా కార్యక్రమాలకు కేటాయించడం విశేషం. 2011 జూన్లో ఆసియన్ హీరోస్ ఆఫ్ ఫిలాంత్రపీగా కీర్తించిన దేశంలోని నలుగురు ప్రముఖులలో ప్రేమ్జీ ఒకరిగా నిలిచారు. 
