బంగారం సింగారం * పెట్టుబడిగా బంగారం

 
పిల్ల బంగారంలా ఉంది... బంగారం లాంటి మనిషి... బంగారు కొండ... గోల్డెన్ స్పూన్‌తో పుట్టాడు... ఓల్డ్ ఈజ్ గోల్డ్... ఇలా చెప్పుకుంటూ పోతే మాటల్లో బంగారం చోటుకి లోటుండదు. పెళ్లయినా, పండగైనా, పూజయినా, వ్రతమైనా, బంగారం మెరిస్తే అదొక అందం. బీరువా నిండా నోట్లున్న వారికన్నా, వంటినిండా బంగారం ఉన్నవాళ్లే ధనవంతులు. అదీ బంగారానికి ఉన్న బంగారంలాంటి గుణం. ఇప్పుడు దాని ధర భగభగా మండుతోంది. కొలిమిలో కాల్చేకొద్దీ ధగధగ మెరిసే బంగారం ధర ఎంత మండితే అంత విలువ. ఆల్‌టైమ్ ప్రెషస్ బంగారం కథా కమామిషూ...
 
బంగారు చరిత్ర...
మొదటిసారిగా బంగారాన్ని ఎలా కనుగొన్నారు? ఎవరు కనుగొన్నారు? అన్న అంశాలపై రకరకాల కథనాలు ప్రచారంలో ఉన్నాయి. భగభగమండే సూర్యుడి చెమట ధార భూమిపై పడి బంగారంగా మారిందనీ, చంద్రుడి కన్నీటి ధార వెండిగా మారిందనీ ఈజిప్ట్ వాసుల నమ్మకం. మరికొంతమంది సూర్యుని స్వేదం బంగారంగా మారిందని విశ్వసిస్తారు. రాతియుగంలో తొలిసారిగా బంగారాన్ని గుర్తించినట్లు చరిత్ర చెపుతోంది. ప్రవహిస్తున్న నదిలో ఒక రాయి పగిలి దాన్నుంచి మిలమిల మెరిసే పదార్థం రావడాన్ని ఒక పిల్లవాడు గుర్తించాడని కూడా చెబుతారు.
ఆ రాళ్లు విభిన్నంగా ఉండటంతో వాటిని ఆహారం తినే పాత్రల్లాగా వినియోగించేవారట. ఆ తర్వాత కాలక్రమంలో బంగారం ఆభరణాలుగా, కరెన్సీగా (వస్తుమార్పిడి) చలామణిలోకి వచ్చింది. మొత్తం మీద చూస్తే 6,000 సంవత్సరాల క్రితం బంగారాన్ని వెలికితీయడం ప్రారంభించారని, 4,000 సంవత్సరాల క్రితం బంగారం వస్తుమార్పిడిగా అంటే కరెన్సీగా వినియోగంలోకి వచ్చిందని చారిత్రక ఆధారాల ద్వారా తెలుస్తోంది. మనదేశంలో గుప్తులు, కుషాణులతో పాటు ఇతర రాజవంశులందరూ బంగారాన్ని ప్రధాన కరెన్సీగా వినియోగించారు.

అప్పటినుంచి ఇప్పటివరకు కూడా బంగారం ఎవరి దగ్గర ఎక్కువ ఉంటే వారిని ధనవంతులుగా భావిస్తున్నారు. కేవలం బంగారు నిధుల ఖజానాలను కొల్లగొట్టడానికే ప్రపంచవ్యాప్తంగా అనేక యుద్ధాలు జరిగాయి. యుద్ధంలో జయించిన బంగారాన్ని నౌకల్లో తరలించేవారు. కొన్నిసార్లు ఆ నౌకలు తుఫాన్లలో చిక్కుకొని సముద్రంలో మునిగిపోయేవి. అలా సముద్రం పాలయిన బంగారం విలువే 10 ట్రిలియన్ డాలర్లు దాటి ఉంటుందని మరో అంచనా.

బంగారం ఎలా ఉత్పత్తి అవుతుంది?
బంగారాన్ని కృత్రిమంగా కంటే సహజసిద్ధంగానే ఎక్కువగా ఉత్పత్తి చేస్తున్నారు. యోగి వేమన కృత్రిమంగా బంగారాన్ని తయారు చేసేవాడని, దీనికో శాస్త్రం(రసవిద్య) ఉందని ప్రచారంలో ఉన్నా ఇంతవరకు అలాంటి ఆధారాలు ఏమీ దొరకలేదు. మొత్తం బంగారం ఉత్పత్తిలో 60 శాతం గనుల నుంచే జరుగుతోంది. బంగారు గనుల్లో ఖనిజాన్ని వెలికితీసి, దాన్ని శుద్ధి చేసి బంగారంగా తయారు చేస్తారు.

మొన్నటి వరకు బంగారు గనులు అనగానే ముందుగా గుర్తుకువచ్చేది దక్షిణాఫ్రికా. కాని ఇప్పుడు ఆ స్థానాన్ని చైనా ఆక్రమించింది. కూలీల వ్యయం బాగా పెరిగిపోవడంతో దక్షిణాఫ్రికాలో చాలా బంగారు గనులు మూతపడ్డాయి. ఇదే సమయంలో అంతర్జాతీయ మార్కెట్లో బంగారం ధరలు బాగా పెరగడంతో గోల్డ్‌మైనింగ్‌పై చైనా దృష్టి సారించింది. గత సంవత్సరం చైనా 345 టన్నుల బంగారాన్ని ఉత్పత్తి చేసి మొదటిస్థానంలో నిలవగా, 255 టన్నులతో ఆస్ట్రేలియా రెండో స్థానంలో, 230 టన్నులతో అమెరికా మూడో స్థానంలో నిలిచింది. ఇవి కాకుండా రష్యా, ఇండోనేషియా, కెనడా వంటి చాలా దేశాలు బంగారాన్ని ఉత్పత్తి చేస్తున్నాయి.

ఆర్‌బీఐ గణాంకాల ప్రకారం 2010 సంవత్సరంలో ప్రపంచవ్యాప్తంగా 2,528 టన్నుల బంగారం ఉత్పత్తి జరిగింది. ఇప్పటికీ 2001లో ఉత్పత్తి అయిన 2,600 టన్నులే రికార్డ్. ఆ రికార్డు ఈ సంవత్సరం చెరిగిపోవచ్చని అంచనా వేస్తున్నారు. 2010 లెక్కలను పరిగణనలోకి తీసుకుంటే ఇప్పటి వరకు 1,68,300 టన్నుల బంగారాన్ని తవ్వి తీశారు. ఈ మొత్తాన్నీ ఘనాకారంలో అమరిస్తే 21 మీటర్లు (69 అడుగులు) ఉంటుందని అంచనా.

బంగారం ఉత్పత్తిలో రాగి కీలకపాత్ర పోషిస్తోందని చెప్పవచ్చు. రాగి వంటి కొన్ని లోహాలను తయారు చేస్తున్నప్పుడు ఉప ఉత్పత్తి కింద బంగారం వస్తుంది. ఇలా మన దేశంలో గత సంవత్సరం 9.22 టన్నుల బంగారం ఉత్పత్తి జరిగింది. ప్రపంచవ్యాప్తంగా గనుల ద్వారా కాకుండా వివిధ పద్ధతుల్లో 1,705 టన్నుల బంగారం ఉత్పత్తి జరిగింది.

మన రాష్ట్రంలో బంగారు గనులు
దేశం మొత్తం మీద 13 రాష్ట్రాల్లో బంగారు గనులు ఉన్నాయనీ, వీటిల్లో మొత్తం 658 టన్నుల బంగారం ఉందనీ ఒక అంచనా. అయితే వాటిని వెలికితీయడం చాలా వ్యయంతో కూడుకున్నది. ఇందులో ప్రధానమైన గనులు చిత్రదుర్గ, కోలార్, రామగిరి గోల్డ్ ఫీల్డ్స్‌గా చెప్పుకోవచ్చు. ఇందులో రామగిరి ఫీల్డ్స్ మన రాష్ట్రంలోని అనంతపురం జిల్లాలో ఉన్నాయి. వీటిని బ్రిటిష్ ప్రభుత్వం 1901లో గుర్తించింది. 1910-1927 మధ్య కాలంలో 1,76,338 ఔన్సుల బంగారాన్ని ఉత్పత్తి చేసింది. అప్పట్లో టన్ను ముడి ఖనిజం నుంచి 15 గ్రాముల దాకా బంగారం వచ్చేది.

కానీ, మార్కెట్ రేటు కన్నా ఉత్పత్తి వ్యయం అధికమై నష్టాలు వాటిల్లడంతో 2001లో ఈ గనులను మూసివేశారు. ఇప్పుడు బంగారం ధరలు పెరగడంతో తిరిగి వీటిల్లో ఉత్పత్తి ప్రారంభించాలని చూస్తున్నారు. మన దేశంలో బంగారు గనులు అనగానే ముందుగా గుర్తుకు వచ్చేది మాత్రం కర్ణాటకలో కోలార్ ఫీల్డ్స్, ఆ తర్వాత చిత్రదుర్గ ఫీల్డ్స్.

వినియోగం
మొత్తం బంగారం వినియోగంలో 50 శాతం వాటా ఆభరణాలదే. ఇంకా పెట్టుబడులు, కరెన్సీ నిల్వలు, పరిశ్రమల్లో కూడా బంగారాన్ని ఉపయోగిస్తారు. 40 శాతం ఇన్వెస్ట్‌మెంట్‌కి వినియోగిస్తే మిగిలిన 10 శాతం పారిశ్రామికావసరాల కోసం వినియోగిస్తారు.
ఇతర లోహాలతో సులభంగా కలిసిపోయే గుణం ఉండటం, కావల్సినంత సన్నగా మెత్తగా సాగే గుణం ఉండటం, అరుగుదల తక్కువగా ఉండటం, పసుపుపచ్చని వర్ణంలో మిలమిల మెరుస్తుండటం వంటి లక్షణాలు బంగారు ఆభరణాలపై మోజు పెంచేలా చేశాయి. ఏరోస్పేస్, ఎలక్ట్రానిక్స్, అణు ఇంధన సరఫరా వంటి వాటిల్లోనూ బంగారాన్ని వినియోగిస్తారు. మనం వాడే కంప్యూటర్లు, చాలా ఎలక్ట్రానిక్ సర్క్యూట్స్‌లో కూడా బంగారాన్ని వినియోగిస్తారు.

ఆహారం, మందుల్లో..
వైద్య పరంగా కూడా బంగారం వల్ల చాలా ప్రయోజనాలున్నాయి. గతంలో రాజులు, పూర్వీకుల్లో చాలామంది వేడివేడి అన్నంపైన అతి పల్చటి బంగారు రేకులు వేసుకుని తినేవారు. దీని వలన రోగనిరోధకశక్తి బాగా పెరుగుతుందని, రక్తప్రసరణ బాగుంటుందని చెపుతారు. ఇప్పుడు బంగారం రేటు పతాక స్థాయికి చేరుకోవడంతో అది చాలా ఖర్చుతో కూడుకున్నదే.

ఇప్పటికీ చాలా స్వీట్లపైన బంగారు రేకులను పూతగా పెడతారు. ఇక మన ఆయుర్వేదం విషయానికి వస్తే స్వర్ణభస్మానికి చాలా ప్రాముఖ్యత ఉంది. ఇప్పుడు బంగారం ధరలు బాగా పెరగడంతో బంగారాన్ని వినియోగించే మందుల ధరలు కూడా పెరిగిపోయాయి. ఉదాహరణకు సిద్ధమకరధ్వజం అనే ఆయుర్వేద మందులో బంగారాన్ని వినియోగిస్తారు.

ఐదేళ్ల క్రితం ఈ మందు తులం ధర రూ.200-300గా ఉంటే ఇప్పుడు రూ.1,000 దాటింది. ఇంగ్లిషు వైద్యంలో కూడా బంగారాన్ని వినియోగిస్తారు. ముఖ్యంగా కృత్రిమ పన్నుల అమరికలో బంగారు పన్నుదే అగ్రస్థానం. అరుగుదల తక్కువగా ఉండటం, తుప్పు పట్టడం వంటి లక్షణాలు లేకపోవడంతో బంగారు పన్నులు అమర్చడానికి డాక్టర్లు సుముఖత చూపుతారు.

దేశాల ఆర్థిక సంక్షోభం నుంచీ గట్టెక్కిస్తాయి
దేశాలను ఆర్థిక సంక్షోభాల నుంచి గట్టెక్కించడంలో పలుమార్లు బంగారం తన సత్తాను చాటుకుంది. అప్పుల ఊబుల్లో కూరుకుపోయినప్పుడు రుమేనియా, రష్యా, ఇండియా వంటి దేశాలను బంగారం సురక్షితంగా ఒడ్డున పడేసింది. 1991లో గల్ఫ్ యుద్ధం కారణంగా ముడి చమురు ధరలు ఆకాశాన్నంటడంతో, దిగుమతుల బిల్లులు చెల్లించడానికి సరిపడ విదేశీ మారక నిల్వలు మన దగ్గర లేకుండా పోయాయి.

అప్పటి ప్రధాని చంద్రశేఖర్ 20 టన్నుల బంగారాన్ని కుదవ పెట్టాల్సిన పరిస్థితి ఏర్పడింది. అందుకనే పలు దేశాలు విదేశీ మారక నిల్వల్లో కొంత భాగాన్ని బంగారం రూపంలో ఉంచడానికి సిద్ధపడతాయి. ఇప్పుడు అంతర్జాతీయంగా సంక్షోభ పవనాలు వీస్తుండటంతో అనేక దేశాలు బంగారు నిల్వలను పెంచుకోవడానికి సమాయత్తమవుతున్నాయి. ఇందులో భాగంగానే మనదేశం 2009లో 200 టన్నుల బంగారం కొనుగోలు చేసింది. ఆర్‌బీఐ అంచనాల ప్రకారం 2011 నాటికి ప్రపంచ వ్యాప్తంగా వివిధ సెంట్రల్ బ్యాంకుల వద్ద మొత్తం 30,700 టన్నుల బంగారం ఉంది.

ఈ ఏడాది మార్చి నాటికి 557.7 టన్నుల బంగారం నిల్వలతో భారత్ ప్రపంచంలో 11వ స్థానంలో నిలిచింది. ఇది భారతవిదేశీ మారకపు నిల్వల్లో 8.7 శాతం వాటాకు సమానం. నిల్వల్లో అగ్రస్థానంలో ఉన్న అమెరికా 8,133.5 టన్నుల బంగారాన్ని హోల్డ్ చేస్తోంది. తన మొత్తం విదేశీ మారకపు నిల్వల్లో ఇది 74.7 శాతం. ఆ తర్వాత స్థానాల్లో వరుసగాజర్మనీ (3,406.8 టన్నులు), అంతర్జాతీయ ద్రవ్యనిధి సంస్థ (3,005.3), ఇటలీ (2,451.8), ఫ్రాన్స్ (2,435.4), చైనా (1,054.1), స్విట్జర్లాండ్ (1,040), రష్యా (830.5), జపాన్ (765.2), నెదర్లాండ్స్ (612.5) ఉన్నాయి.

బంగారాన్ని ఎక్కడ నిల్వ చేస్తారు?
సాధారణంగా మనం బంగారాన్ని అత్యంత సురక్షితంగా ఉండే సేఫ్టీ లాకర్లు, బ్యాంకు లాకర్లలో భద్రపర్చుకుంటాం. కాని ఇన్వెస్ట్‌మెంట్ సంస్థలు, కేంద్ర బ్యాంకులు దగ్గర ఉన్న టన్నుల కొద్దీ బంగారాన్ని ఎక్కడ దాస్తాయి? బంగారాన్ని దాచడానికి ప్రపంచవ్యాప్తంగా పలు చోట్ల మన ఎఫ్‌సీఐ గోడౌన్ల మాదిరిగానే గోల్డ్ వాల్ట్‌లున్నాయి. ఇలాంటి పెద్దవాల్ట్‌లు మనదేశంలో లేవు. సింగపూర్, బ్రిటన్, జర్మనీ, అమెరికా దేశాల్లో ఇవి ఉన్నాయి.

గాలి కూడా లోపలికి చొరబడని విధంగా అత్యంత కట్టుదిట్టమైన భద్రత మధ్య వీటిని నిర్వహిస్తారు. ఇప్పుడు బంగారంలో ఇన్వెస్ట్ చేసే వారి సంఖ్య బాగా పెరుగుతుండటం, కేంద్ర బ్యాంకులు వాటి నిల్వలను పెంచుకోవడంతో బంగారం దాచుకునే గోడౌన్లకు తీవ్ర కొరత ఏర్పడటంతో పలు కంపెనీలు వీటి విస్తరణపై దృష్టి సారిస్తున్నాయి.

బంగారంపై డాలరు ప్రభావం
బంగారాన్ని ఇప్పుడు చాలామంది పెట్టుబడి సాధనంగా చూడటంతో డిమాండ్ బాగా పెరిగింది. అలాగే ఇతర పెట్టుబడి సాధనాలు నష్టాలను అందిస్తుండటంతో ఇన్వెస్టర్లు వారి సంపదను బంగారంగా మార్చుకుంటున్నారు. దీనివల్ల అంతర్జాతీయంగా బంగారం ధరలకు రెక్కలు వచ్చాయి. భారతదేశం విషయానికి వస్తే డిమాండ్ అండ్ సప్లయిలే కాకుండా డాలరు కూడా బంగారం ధరలను నిర్దేశిస్తుంది.

రూపాయితో డాలరు మారకం విలువ పెరుగుతుంటే బంగారం విలువ పెరుగుతుంది. తగ్గితే తగ్గుతుంది. ఉదాహరణకు గతంలో అంతర్జాతీయ మార్కెట్లో ఔన్స్ బంగారం ధర 1600 డాలర్లు ఉన్నప్పుడు ఇండియాలో పది గ్రాముల బంగారం ధర రూ.23,000గా ఉండేది.

అంతర్జాతీయ మార్కెట్లో బంగారం ధర 11 శాతం పెరిగి ప్రస్తుతం 1781 డాలర్ల వద్ద ఉంటే ఇండియాలో మాత్రం ఏకంగా 27 శాతం పెరిగి రూ.29,270లకు చేరింది. దీనికి కారణం ఈ కాలంలో రూపాయి విలువ భారీగా క్షీణించి డాలరు విలువ పెరగడమే. ఔన్స్ బంగారం 1,600 డాలర్ల వద్ద ఉన్నప్పుడు ఒక డాలరు విలువ రూ.45 ఉంటే ఇప్పుడది రూ.50 దాటింది. దీని వలన అంతర్జాతీయ మార్కెట్లలో బంగారం ధర తగ్గుతున్నా ఆ ప్రభావం దేశీయ విలువపై ప్రతిబింబించడం లేదు.
- చంద్రశేఖర్ మైలవరపు

పెట్టుబడిగా బంగారం
పదకొండు సంవత్సరాల నుంచి ప్రతీ సంవత్సరం లాభాలను అందిస్తున్న ఏకైక సాధనం బంగారం కావడంతో ఇందులో పెట్టుబడులు పెట్టడానికి ఇన్వెస్టర్లు మొగ్గు చూపుతున్నారు. దీనికి తోడు స్టాక్ మార్కెట్లు, ప్రపంచ ఆర్థిక వ్యవస్థలు గందరగోళంగా ఉండటం కూడా బంగారు పెట్టుబడులపై మోజు పెంచేలా చేస్తున్నాయి. బంగారంలో మదుపు చేయడానికి అనేక మార్గాలు అందుబాటులోకి వచ్చాయి. నేరుగా బంగారం కొనడం దగ్గర నుంచి కాగితం రూపంలో బంగారం కొనడం వరకు చాలా మార్గాలున్నాయి.
వీటిలో గోల్డ్ ఫండ్స్, గోల్డ్ ఈటీఎఫ్‌లు, గోల్డ్ సేవింగ్ ఫండ్స్, గోల్డ్ ఫ్యూచర్స్ ప్రధానమైనవి. నేరుగా బంగారాన్ని కొనుగోలు చేస్తే వాటిని భద్రపర్చడం కష్టమైన విషయం కాబట్టి పేపర్ రూపంలోని బంగారం వైపే ఇన్వెస్టర్లు మొగ్గు చూపుతున్నారు.
గోల్డ్ ఫండ్స్ :
ఇవి నేరుగా బంగారంలో ఇన్వెస్ట్ చేయవు. అంతర్జాతీయంగా బంగారాన్ని ఉత్పత్తి చేసే కంపెనీల్లో ఇన్వెస్ట్ చేస్తాయి. ఇవి ఇంటర్నేషనల్ ఓపెన్ ఎండెడ్ ఈక్విటీ ఫండ్స్ విభాగంలోకి వస్తాయి. ప్రస్తుతం ఏఐజీ వరల్డ్ గోల్డ్ ఫండ్, డీఎస్‌పీ బ్లాక్ రాక్ వరల్డ్ గోల్డ్ ఫండ్స్ అందుబాటులో ఉన్నాయి.
గోల్డ్ ఈటీఎఫ్‌లు :
వీటినే గోల్డ్ ఎక్స్ఛేంజ్ ట్రేడెడ్ ఫండ్స్ అంటారు. వీటికి డిమాండ్ బాగా పెరుగుతోంది. గత ఏడాది సెప్టెంబర్ నాటికి గోల్డ్ ఈటీఎఫ్‌ల్లో రూ.2,849 కోట్లు ఇన్వెస్ట్ చేస్తే ఈ సంవత్సరం సెప్టెంబర్ నాటికి ఈ విలువ రూ. 8,173 కోట్లకు చేరింది. ప్రస్తుతం 11కుపైగా గోల్డ్ ఈటీఎఫ్‌లు అందుబాటులో ఉన్నాయి. ఎస్‌బీఐ, యూటీఐ, ఐసీఐసీఐ, బెంచ్‌మార్క్ వంటి పలు మ్యూచువల్ ఫండ్ సంస్థలు వీటిని అందిస్తున్నాయి. ఇవి ఇన్వెస్టర్ల నుంచి సేకరించిన మొత్తంతో నేరుగా బంగారాన్ని కొనుగోలు చేస్తాయి.
మీరు ఇన్వెస్ట్ చేసిన విలువకు సమానంగా యూనిట్లను కేటాయించి ఆ మేరకు కాగితం రూపంలో మీకు తెలియచేస్తాయి. ఈటీఎఫ్‌లు ఓపెన్ ఎండెడ్ ఫండ్స్ కావడంతో ఎప్పుడు కావాలంటే అప్పుడు కొనొచ్చు, అమ్ముకోవచ్చు. కానీ వీటిల్లో ఇన్వెస్ట్ చేయాలంటే మాత్రం డీ-మ్యాట్ అకౌంట్ ఉండాలి. సిప్ (సిస్టమాటిక్ ఇన్వెస్ట్‌మెంట్ ప్లాన్) విధానంలో ఇన్వెస్ట్ చేసే వెసులుబాటు లేదు. కనీస ఇన్వెస్ట్‌మెంట్ మొత్తం రూ.5,000.

గోల్డ్ సేవింగ్ ఫండ్స్
డీమ్యాట్ అకౌంట్ అవసరం లేకుండా ఒకేసారి లేక ప్రతీ నెలా సిప్ విధానంలో ఇన్వెస్ట్ చేసుకునే అవకాశాన్ని ఇవి కల్పిస్తున్నాయి. ఇవి ఫండ్ ఆఫ్ ఫండ్ కోవలోకి వస్తాయి. అంటే ఇన్వెస్టర్ల నుంచి సేకరించిన మొత్తంతో నేరుగా బంగారాన్ని కొనుగోలు చేయకుండా అదే సంస్థకు చెందిన గోల్డ్ ఈటీఎఫ్‌లో పెట్టుబడి చేస్తాయి. అంటే మీ తరపున ఈ పథకాలు గోల్డ్ ఈటీఎఫ్‌ల్లో ఇన్వెస్ట్ చేస్తాయి. చిన్న మదుపుదారులను ఆకర్షించడానికి వీటిని ప్రవేశపెడుతున్నారు.
ఫ్యూచర్స్:
బంగారం విలువలో కేవలం 5-10 శాతం చెల్లించడం ద్వారా బంగారంలో పొజిషన్లు తీసుకోవచ్చు. ఒక గ్రాము బంగారం దగ్గరి నుంచి కేజీ బంగారం వరకు మీ మార్జిన్ మనీ, రిస్క్ సామర్థ్యం ఆధారంగా ట్రేడింగ్ చేయవచ్చు. బంగారం ధర పెరుగుతుందన్న నమ్మకం ఉంటే లాంగ్ పొజిషన్లు, అదే తగ్గుతుందని భావిస్తే షార్ట్ పొజిషన్లు తీసుకోవచ్చు. వీటిల్లో రిస్క్ ఎక్కువగా ఉంటుంది కాబట్టి ట్రేడింగ్‌పై పూర్తి అవగాహన ఉన్న వారికి మాత్రమే అనువైనవి. ప్రస్తుతం గోల్డ్ ఫ్యూచర్స్‌ను ఎన్‌సీడీఈఎక్స్, ఎంసీఎక్స్, నేషనల్ స్పాట్ ఎక్స్ఛేంజ్‌లు అందిస్తున్నాయి.

మన వారి మెడల్లో 20,000 టన్నుల బంగారం

  భారతీయులకు బంగారంపై ఎనలేని మోజు అనడంలో ఎటువంటి సందేహం లేదు. ఇండియాలో అందరి దగ్గర ఉన్న బంగారాన్ని లెక్కిస్తే కళ్ళు తిరగటం ఖాయం. గతేడాది 963 టన్నుల బంగారాన్ని కొనుగోలు చేశారంటే గోల్డ్ క్రే జ్ ఏం రేంజ్‌లో ఉందో అర్థం చేసుకోవచ్చు. దీనితో కలుపుకుంటే ఇప్పుడు మన వాళ్ళ దగ్గర 20,000 టన్నుల బంగారం ఉందంట.
ఇది రిజర్వ్ బ్యాంక్, ఇతర సంస్థల దగ్గరున్న బంగారాన్ని లెక్కలోకి తీసుకోకుండానే. ఈ మొత్తం విలువ ఎంతో తెలుసా? అక్షరాలా అరవై వేల బిలయన్ల రూపాయలు. అంకెల్లో 6000000,00,00,000 (ఆరవై లక్షల కోట్లు). ఇది అమెరికా, యూరో జోన్, చైనా, స్విట్జర్లాండ్ కేంద్ర బ్యాంకులు కలిగి వున్న మొత్తం కంటే ఎక్కువ. ఈ స్థాయిలో ఏ దేశ ప్రజల వద్ద కూడా బంగారం లేదు.
 
మన పెళ్లిళ్లకు ఏటా 500 టన్నులు 
ఇండియాలో ఏటా పెళ్లిళ్ల కోసం 500 టన్నుల బంగారం అవసరమవుతుందని వరల్డ్‌గోల్డ్ కౌన్సిల్ అంచనా వేస్తోంది. అంటే ఏటా కేవలం పెళ్లిళ్ల కోసం 15 లక్షల కోట్ల విలువైన బంగారాన్ని కొనుగోలు చేస్తున్నారు. ఇండియా జనాభాలో 25 సంవత్సరాల లోపు వయస్సు కలిగినవారు అధికంగా ఉన్నారని, ఈ లెక్కన చూస్తే వచ్చే 10 సంవత్సరాల్లో ఏటా 5 కోట్ల పెళ్లిళ్లు జరుగుతాయని ఒక అంచనా. అంటే వచ్చే పదేళ్లల్లో కేవలం పెళ్లిళ్ల కోసం ఏటా సగటున 500 టన్నుల చొప్పున వచ్చే 10 ఏళ్లల్లో 5,000 టన్నుల బంగారాన్ని కొనేస్తామన్నమాట!